Igitekerezo cyo gushinga CPF Foundation cyaturutse ku banyamuryango ba CPF INEZA, nyuma yo kubona ko hakenewe kongerwa imbaraga mu bikorwa bigamije inyungu mbonezamubano n’imibereho yabo. Inteko Rusange y’abanyamuryango yo mu Ukwakira 2025 ni yo yafashe umwanzuro wo gushyiraho iyi Foundation, kugira ngo ifashe guteza imbere iki gice cyari kitarahabwa imbaraga zihagije.

Uwo mwanzuro watumye hashyirwaho CPF Foundation nk’ikigo kizunganira CPF INEZA mu kubaka ubushobozi bw’abanyamuryango no guteza imbere imibereho yabo, mu rwego rwo gutuma ibikorwa by’imari n’inyungu mbonezamubano bigenda hamwe.

Abayobozi bayo bavuga ko nubwo ibikorwa by’imari byagiye bitera imbere, hari igice cy’inshingano za koperative cyari kitarahabwa imbaraga zihagije, ari cyo kijyanye n’inyungu mbonezamubano n’imibereho y’abanyamuryango.

Perezidante wa CPF INEZA, Yvonne Mutakwasuku, avuga ko ari yo mpamvu hafashwe umwanzuro wo gushyiraho CPF Foundation, nk’ikigo cyunganira CPF INEZA.

“Twararebye dusanga igice cy’amafaranga kirakura neza, ariko igice mbonezamubano cy’abanyamuryango ndetse n’inyungu koperative igomba kugira aho ikorera nticyari gifite imbaraga zihagije. Ni ho hatekerejwe ko habaho ikindi kigo cya kabiri cyunganira CPF INEZA, aricyo twashinze none”

Mutakwasuku avuga ko CPF Foundation izajya ikora nk’“pepiniyeri” y’abanyamuryango, ibategura mbere yo kugera ku rwego rwo gukoresha neza serivisi z’imari zitangwa na CPF INEZA. Aho avuga ko hazajya hatangwa amahugurwa ku micungire y’imari, guhanga imirimo no guteza imbere imishinga, ndetse inafashe abantu gukoresha neza amahirwe y’imari bahabwa.

Ati:“Niba ari twe twateruye umuntu tukamwigisha, tukamuherekeza akabona inguzanyo, ntituzareba gusa ko yashoboye kwishyura. Tuzareba ngo byamuteje imbere gute? Byamwubatse gute kugira ngo abe umuntu ushoboye?”

Kuri we, ibi bizafasha CPF INEZA kugira abanyamuryango biteguye neza gukoresha serivisi z’imari, aho gutanga inguzanyo gusa hatabayeho gukurikirana uko iyo nguzanyo yagize uruhare mu iterambere ry’umunyamuryango.

Umuyobozi wa CPF INEZA Madamu Uwamariya Chantal nawe yavuze ko CPF Foundation izafasha mu kugera ku ntego z’ubukungu budaheza ( financial inclusion), aho serivisi z’imari zigomba kugera ku bantu benshi, harimo n’abari bafite imbogamizi zababuzaga kuzigeraho.

Yagize ati “Hari abazaga bizeye ko babasha gufashwa, ariko bakagera muri banki bakababwira ko hano ari inguzanyo. Foundation rero ni yo izajya icenshura ibyo bitekerezo. Ni yo mpamvu uzumvamo amahugurwa, ingendo shuri n’ubufasha mu gihe bikenewe.”

Yatanze urugero rw’umubyeyi ushobora kuba akeneye amafaranga yo kwishyurira umwana ishuri, ariko akaba adafite umushinga ushobora guhita umwinjiriza amafaranga yo kwishyura inguzanyo. Avuga ko mu gihe Foundation yaba iri hafi ye, uwo muntu ashobora gufashwa mu buryo bumufasha gukomeza kwishyurira umwana ishuri, mu gihe na we ategurirwa uburyo bwo kubona umusaruro uhoraho.

Perezida watorewe kuyobora CPF Foundation, Pasiteri Mushumba Raphael, avuga ko intego atari ukongera gusa umubare w’abanyamuryango cyangwa amafaranga azenguruka muri CPF INEZA, ahubwo ari no kureba niba ubuzima bw’abanyamuryango butera imbere.

Avuga ko CPF Foundation izibanda ku bipimo by’imibereho myiza y’abanyamuryango, harimo uburezi, ubumenyi mu micungire y’imari n’ibindi bikorwa bigamije kuzamura imibereho yabo.

“Niba dufite abanyamuryango ibihumbi birenga 21 nibura bose bagomba kubyungukiramo. Ntibabe abanyamuryango gusa, ahubwo bagire n’ubushobozi bwo gukoresha ayo mahirwe y’imari, kandi imibereho yabo ibashe kuzamuka.”

Mushumba avuga ko gahunda za Foundation zizareba umuntu mu buryo bwuzuye, atari ku ruhande rw’ubukungu gusa, ahubwo hakitabwa no ku mibereho myiza, imibanire n’izindi mpande zigize ubuzima bw’umuntu.

Kugira ngo CPF Foundation ikore mu buryo bwemewe nk’ikigo cyigenga, igomba kunyura mu nzira zo kubona ubuzima gatozi, zirimo gutegura no gutanga sitati, amategeko ngengamikorere, icyerekezo n’izindi nyandiko zisabwa n’urwego rubifitiye ububasha, ari rwo Rwanda Governance Board (RGB). Biteganyijwe ko ibisabwa byujujwe bitarenze ku wa 31 Ukuboza 2026, kugira ngo Foundation itangire ibikorwa byayo mu buryo bwuzuye guhera ku wa 1 Mutarama 2027.

CPF INEZA izakomeza kwibanda kuri serivisi z’imari zirimo kubitsa, kubikuza no gutanga inguzanyo, mu gihe CPF Foundation izibanda ku kubaka ubushobozi bw’abanyamuryango no guteza imbere imibereho yabo, binyuze mu mahugurwa y’imicungire y’imari, ubujyanama, gufasha gutegura imishinga n’izindi gahunda zigamije ko serivisi z’imari zikoreshwa neza. Ni yo mpamvu Foundation ifatwa nka “pepiniyeri” y’abanyamuryango, aho babanza guhabwa ubumenyi n’ubushobozi mbere yo gukoresha neza amahirwe ya serivisi z’imari.