Ibi byagarutsweho mu imurikabikorwa ry’ibyagezweho n’Inama Njyanama y’Akarere ka Muhanga muri manda y’imyaka itanu ya 2021–2026, ryabereye muri Hoteli Saint André Kabgayi ku wa Mbere, tariki ya 21 Nzeri 2026.

Umuyobozi w’Akarere ka Muhanga, Kayitare Jacqueline, yagaragaje ko mu bijyanye n’ubwikorezi, akarere kavuye ku birometero bitandatu bya kaburimbo kari gafite mbere y’iyi manda, kakongeraho ibindi birometero 35 muri iyi myaka itanu.

Yashimangiye ko iyi mihanda yagize uruhare mu korohereza urujya n’uruza no gukomeza kuzamura ishoramari n’iterambere ry’ubukungu mu karere.

Ati: “Mu bwikorezi twari dufite ibirometero bitandatu bya kaburimbo. Turishimira ko muri iyi myaka itanu twashoboye kongeraho ibirometero 35, byagize uruhare mu gukomeza kuzamura ishoramari n’iterambere mu karere kacu.”

Ntabwo ibikorwa remezo by’ubwikorezi byagarukiye ku mihanda ya kaburimbo, kuko hubatswe ibiraro byo mu kirere 15 bifasha abaturage batuye mu bice by’imisozi miremire, ndetse hubakwa n’ibiraro bitanu byo ku butaka bifasha urujya n’uruza rw’ibinyabiziga.

Ku rundi ruhande, akarere katunganyije imihanda y’igitaka ifite uburebure bwa kilometero 437,3, hagamijwe korohereza abaturage mu buhahirane, ingendo no kugera kuri serivisi zitandukanye.

Mu bijyanye n’iterambere ry’ubucuruzi n’imijyi, hazamuwe amagorofa 36 y’ubucuruzi, mu gihe Umujyi wa Muhanga wakomeje kuvugururwa. Icyanya cy’inganda na cyo cyateye imbere, umubare w’inganda uriyongera ndetse n’amahirwe yo kubona akazi araguka.

Ibyo bikorwa byagize uruhare mu mibereho y’abaturage, nk’uko bamwe  babigaragaje. Bimenyimana Marcellin wo mu Murenge wa Rongi yashimye imikoranire myiza hagati y’abaturage n’ubuyobozi, avuga ko ubwo bufatanye bwagize uruhare mu gutuma bagera ku iterambere bafite uyu munsi.

Delibe Gasa uhagarariye DJAF na we yashimye ibikorwa byagezweho muri iyi manda, asaba abazakomereza ku nshingano muri manda itaha kubakira ku byo Inama Njyanama izaba yasize igezeho, aho gutangirira ku ntangiriro.

Ati: “Abazakora muri manda itaha bakwiye gukomereza aho Inama Njyanama irangije manda yasize, bakongeramo n’imbaraga. Ikipe itsinda ntigasimburwe.”

Ibyagezweho ntibigaragarira muri raporo gusa.

Guverineri w’Intara y’Amajyepfo, Kayitesi Alice, yashimye umusaruro w’iyi manda, ashimangira ko ibikorwa byagezweho na Muhanga bitagarukira muri raporo gusa ahubwo bigaragarira n’amaso y’umuntu unyuze mu Mujyi wa Muhanga no mu bindi bice by’akarere.

Ati: “Ibikorwa mwagezeho muri iyi myaka itanu ishize ntabwo bigaragarira muri raporo mwakoze gusa, ahubwo n’utambuka wese ugenda muri uyu mugi ndetse no mu bice bitandukanye by’aka karere abona umusaruro w’imbaraga, ubwitange ndetse n’ubufatanye byabaranze muri iyi myaka itanu.”

Yashimiye ubuyobozi bw’igihugu ku cyerekezo butanga, ibikorwa by’iterambere bigera ku baturage n’ingengo y’imari ituma bishyirwa mu bikorwa. Yagaragaje ko umusaruro w’iyi myaka wagaragaye mu bikorwa remezo, uburezi, ubukungu, imibereho y’abaturage n’imiyoborere myiza.

Ku birebana n’iherezo rya manda, Kayitesi yasobanuye ko imyaka itanu irangiye atari iherezo ry’inshingano zo guteza imbere igihugu n’abaturage, ahubwo ko ari iherezo ry’icyiciro runaka cy’imikorere.

Ati: “Uyu munsi nubwo tuvuga ko manda igana ku musozo ntabwo tuba tuvuga abantu, ahubwo ni uburyo bw’imikorere tuvuga. Uburyo bw’imikorere bw’imyaka itanu burarangiye ariko abantu kuvuga no gukora ibyateza imbere igihugu ntabwo bihagarara.”

Yasabye abagiye kurangiza iyi manda gukomeza gutanga umusanzu wabo mu iterambere, mu gihe abazakomereza ku nshingano bazaba bafite umukoro wo kubakira ku byagezweho.

Muri uwo murongo, yashimangiye ko ibyagezweho bitagomba gutuma akarere kunyurwa n’aho kageze, ahubwo ko bikwiye kuba umusingi wo kugera ku bindi byinshi.

Ati: “Ntabwo dukwiriye kunyurwa n’aho turi. Kuko dukeneye byinshi, ariko niba kimwe cyarakozwe bigaragaza ko n’ibindi byinshi byashoboka.”

Guverineri kandi yagarutse ku ruhare rw’urubyiruko mu hazaza h’igihugu, asaba ko rushyigikirwa, rugahabwa akazi, rukagira indangagaciro kandi rugira uruhare mu iterambere.

Ati: “Twese turi gusaza. Inshingano turimo, ibyo dukora byose twabigiyemo turi urubyiruko. Ni ngombwa rero ko dufasha urubyiruko, tukagira urubyiruko rufite indangagaciro, ruri mu kazi aho kuba mu nzoga n’ahandi.”

Ibyagezweho muri iyi  myaka itanu ishize bisigiye Muhanga urufatiro rwo gukomeza urugendo rw’iterambere. Umukoro w’abazakomereza ku nshingano ni ukubakiraho, kubungabunga ibyakozwe no kubyongerera imbaraga, kugira ngo ibyo Guverineri yavuze ko bigaragarira n’amaso birusheho kwigaragaza mu mibereho y’abaturage no mu iterambere ry’akarere.